আকাশখন গোমা হোৱাৰ দৰে
গোমা
গোমা
এই দিনৰ উত্তাপ।
উৰি আছে জাক পাতি শগুন
তাড়না
পেটৰ
কেমেৰাৰ লেন্সত
এটা শগুন
এটা শিশু
দুয়ো ভোকত আতুৰ
কেভিন, কেভিন—
মাতে কোনে
দুৱাৰৰ সিপাৰে
মাজনিশা সাৰ পাই উঠি
কেভিন কাৰ্টাৰৰ সেই ফটোখন
কেতিয়াবা চাওঁ
ৰাতি হ’লে
জাক জাক শগুন উৰি ফুৰে
মোৰ আঁঠুৱাৰ ওপৰত
আইনাত নিজকে চাওঁ
দেখোঁ—
এজাক ভোকাতুৰ মানুহৰ মুখ
এৰা,
মানুহবোৰৰো ভোক আছে।
শোক আছে।
সপোন আছে।
ভাগ্যই বাট নিদিয়া মানুহবোৰৰ
যাপিত যন্ত্ৰণা কোনে শুনে?
কেভিন কাৰ্টাৰ
কেভিন কাৰ্টাৰ
কোনে মাতে—
আন্ধাৰৰ সিপাৰে…
✽
কেভিন কাৰ্টাৰৰ বিষয়ে পঢ়ক।
‘কেভিন কাৰ্টাৰৰ সেই ফটোখন’ৰ বিষয়ে পঢ়ক।
❧ | আৰু পঢ়ক:
