ভ্ৰমণ বিলাস

কিতাপ আটাইবোৰ পৰ্যটক
যলৈকে মন যায় গুচি যায়
আনকি আৰামৰ লাইব্ৰেৰিতো সোমাই নাথাকি
ঘপকৈ ওলাই যায়, এবাৰো ঘূৰি নাচায়
কোনোবা অচিন মানুহৰ সৈতে যায়গৈ গুচি।

কোনোবাখন বহু দূৰ পায়গৈ
কোনোবাখন পৰি থাকে
ধূলিময় চেলফত।
দুখনমান সোমাই থাকে
পুৰণি নোটবুকৰ মাজত
কোনেও নেদেখে
পেলনীয়া খৰাহিতো
পৰি ৰয় দুই এখন
পিছে তাৰ মাজতো স্মাৰ্টকেইখনে
বিচাৰি ওলায়গৈ
ছেকেণ্ড হেণ্ড কিতাপৰ দোকান
দীঘলীয়া ভ্ৰমণৰ সপোন লৈ।

দুখে-ভাগৰে, ফটা-ছিগা হৈ
যিকেইখন ঘূৰি আহে
সিহঁতে কয় দেখি অহা ঠাইবোৰৰ কথা,
এতিয়া নিজৰ কৃতিত্বতে সিহঁতে
জিৰণিৰ আমেজ ল’ব।
আনকেইখনৰ ভ্ৰমণ
দেশৰ পৰা দেশান্তৰলৈ, অবিৰত
তাতেই সিহঁত হেৰাই যায়।

আৰু পঢ়িব পাৰে