বহুদিনেই হ’ল তোমাক নেদেখা

বহুদিনেই হ’ল তোমাক নেদেখা
দোপাট্টাৰে ওৰণি টানি ৰাজপথৰ দাঁতিত
কিম্বা বাছষ্টপৰ ভিৰত
আজিওচোন তোমাৰ অনুপস্থিতি।

নীলিম দুচকুৰ নীলাভ সৰোবৰ
বহুদিনেই হ’ল নেদেখা
কৃষ্ণচূড়াৰ তলেৰে উৰ্বশীৰ আগমনি
অনেক দিন নাই দেখা।
হোষ্টেলৰ বন্ধ খিৰিকীয়ে
তৃষ্ণাতুৰ দুচকুত হুমুনিয়াহ ছটিয়াই গ’ল।

বহুদিনেই হ’ল তোমাক নেদেখা
মেঘালী চুলিৰ নৈ যেন স্খলিত ধাৰাই
বহুদিনেই হ’ল, ক্লান্ত মন শাঁত পেলোৱা।

তোমাৰ অনুপস্থিতিত
এই চহৰ আজি বৰ নীৰৱ,
সলালা নেকি তুমি চহৰৰ ঠিকনা…?

❧ | অধিক কবিতা:

এই লেখকৰ সকলো লেখা চাওক →

বহুদিনেই হ’ল তোমাক নেদেখা | দেৱজীৎ বৰা

Follow Nilacharai on Facebook