এই যেন আহিবা শৰৎ চুবলৈ

প্ৰথম কুঁৱলিৰ আৱৰণ ফালি শৰৎ নামিছে
মোৰ পদূলিত আজি শৰতৰ শেৱালি সৰিছে
পলকতে মনত স্নিগ্ধ সুবাসে পুলক ঢালিছে
সখি, তোমালৈ ঘনাই মনত পৰিছে।

মনত পৰেনে সখি— শৈশৱৰ চোতালত
কোঁচ ভৰাই শেৱালি বোটলা
কত ৰং কত হেঁপাহ আৰু ল’ৰালিৰ ধেমালি
হাতত সময়, দুচকুত সপোন
শৰতৰ পুৱাত শেৱালিৰ শুভ্ৰ সাজত মগন হোৱা?

দূবৰিৰ দলিচাত নিয়ৰৰ টোপাল দুভৰিত লাগি
হয় হৃদয় উমাল
এই যেন দৌৰি আহিবা আকৌ কাষলৈ
একেলগে খোজ দিম শৰৎ চুবলৈ।

তলসৰা শেৱালিবোৰ দুহাতেৰে তুলি ভাবিছোঁ
পুনঃ সেই পল নাহে আৰু ঘূৰি!

মোৰ পদূলিত আজি শৰতৰ শেৱালি সৰিছে সখি!
আজি তোমালৈ ঘনাই মনত পৰিছে।

HeadSir

অসমীয়া বানান শুধৰণি সঁজুলি

এতিয়াই ব্যৱহাৰ কৰক