পৃথিৱীত জীয়েকবোৰেই দেউতাকক বচায়

ই অতি বিশাল‌ দৃশ্য, ই অতি কৰুণ
ই হ’ল আটাইৰে ভাতমুঠিৰ নিমখকণ।

দূৰণিৰ দেশত আছিল এখন ৰঙা জেলখানা
বৃদ্ধ এক কবি আহিল মৃত্যুদণ্ড লৈ
পাছদিনাৰ পৰা হ’ল বলৱৎ
কবিৰ আশৈশৱ বন্ধুৱে দিছে চিনাকি কৰাই।

ফাঁচি নহয়, বিষ নহয়, শিৰচ্ছেদ নহয়
প্ৰতিদিনে তিলতিলকৈ মৃত্যু হ’ব তেওঁৰ
কোনেও আনি দিব নোৱাৰিব তেওঁক পানী
আনি দিব নোৱাৰিব অকণমান আহাৰ।

যিয়ে দিব, লগে লগে বিহা হ’ব তেওঁক কাৰাদণ্ড
কিন্তু দিলেহি এজনে কাপোৰৰ তলত লুকুৱাই
কাহানিও কোনেও ভবা নাছিল যি সেয়াওতো ঘটে
কবিৰ জীয়েক জেললৈ আহে কোলাত কেঁচুৱা লৈ।

দেউতাকক দেখি দিলে হুকহুকাই কান্দি
কবিয়ে ক’লে, ‘মই ভোক সহিব পাৰোঁ,
পিয়াহ নোৱাৰোঁ যে সহিব, মোক লাগে যিকোনো তৰল
অকণমান গৰল লাগে অকণমান গৰল।’

কবিৰ জীয়েকে চকু মচি কিবা এটা ভাবিলে
কোনো নাই, জেলখানা একেবাৰে নিৰ্জন
কবিক বচাব লাগিব পৃথিৱী বচাবলৈ
দেউতাকৰ মুখত সুমুৱাই দিলে স্তন।

নিজৰ জীয়েকৰ গাখীৰেৰে মুখ ভৰি যায়
পৃথিৱীত জীয়েকবোৰেই দেউতাকক বচায়।

সুবোধ চৰকাৰ পশ্চিমবংগৰ এজন আধুনিক কবি। তেখেতৰ জন্ম হৈছিল ১৯৫৮ চনত। পেশাত ইংৰাজীৰ অধ্যাপক সুবোধ চৰকাৰৰ এতিয়ালৈকে বিশখনৰো অধিক কাব্যগ্ৰন্থ আৰু অন্য গ্ৰন্থ প্ৰকাশিত হৈছে। ২০০০ চনত পশ্চিমবংগ বাংলা অকাডেমী পুৰস্কাৰ লাভ কৰা সুবোধ চৰকাৰৰ উল্লেখযোগ্য কাব্যগ্ৰন্থ হৈছে— ‘একা নৰকগামী’ (১৯৮৮), ‘মণিপুৰেৰ মা’ (২০০৫), ‘যা উপনিষদ তাই কোৰাণ’ (২০০৬), ‘প্ৰতিবাদেৰ কবিতা’ (২০০৭)। উল্লেখ্য যে সুবোধ চৰকাৰৰ পত্নী প্ৰয়াত মল্লিকা সেনগুপ্ত এগৰাকী বিশিষ্ট নাৰীবাদী কবি আৰু সাহিত্যিক।

HeadSir

অসমীয়া বানান শুধৰণি সঁজুলি

এতিয়াই ব্যৱহাৰ কৰক