ব'ল বোম: নব্য হিপ্পীবাদৰ উত্থান?

কু ৰি শতিকাৰ সপ্তম দশকত ভিয়েটনাম যুদ্ধৰ সময়তে আমেৰিকাত গা কৰি উঠিছিল সামাজিক আৰু ধাৰ্মিক স্থিতাৱস্থাৰ বিৰূদ্ধে এক সমান্তৰাল জীৱনধাৰা৷ হিপ্পী বুলি কোৱা সেইসকলে আমেৰিকান সমাজৰ প্ৰচলিত জীৱনধাৰা আৰু গীৰ্জাকেন্দ্ৰিক ধৰ্মীয়-সামাজিক মতবাদবোৰৰ বিৰূদ্ধে জেহাদ ঘোষণা কৰি এক সুকীয়া জীৱন পদ্ধতি গঢ় দিছিল৷ হিপ্পীসকলে অনুসৰণ কৰিছিল বৌদ্ধবাদকে ধৰি শৈৱ-বামাচাৰ আদি প্ৰাচীন সনাতন পন্থাৰ কেতবোৰ বিষয়৷ ফুলাম কাপোৰ, চুলিত জঁট, ভাং-ঘোটা সেৱন, সমূহীয়া মুক্ত যৌনাচাৰ, নিৰামিষ আহাৰ-সমূহীয়া ভোজন, ফক আৰু ৰক সংগীতৰ সমাহাৰ আদি আছিল হিপ্পীৰ সংস্কৃতি৷ হিপ্পীবাদক বহুতে উচ্ছৃংখল জীৱন পদ্ধতি বুলি সমালোচনা কৰিছিল যদিও ই ইউৰোপত এক প্ৰগতিশীল চিন্তাৰো জন্ম দিছিল৷ বব ডীলান, বব মাৰ্লি আদিৰ দৰে শিল্পী এই হিপ্পীবাদৰেই সৃষ্টি৷ হিপ্পীবাদৰ জন্ম ৭ৰ দশকত ইউৰোপৰ এক বিশেষ সামাজিক-অৰ্থনৈতিক পটভূমিত হৈছিল আৰু ই আছিল মূলতঃ সাম্ৰাজ্যবাদ আৰু পুঁজিবাদ বিৰোধী৷ ৰণোন্মাদ আমেৰিকাৰ বিৰূদ্ধে ‘যুদ্ধবিৰোধী আৰু শান্তিকামী’ মতাদৰ্শ আছিল হিপ্পীবাদ৷

মুক্ত অৰ্থনীতিয়ে ভাৰতৰ দৰে তৃতীয় বিশ্বৰ দেশবোৰতো ব্যক্তিকেন্দ্ৰিকতা আৰু ভোগবাদ বিয়পাই দিছে৷ মানুহৰ পৰস্পৰৰ মাজত বিচ্ছিন্নতা বাঢ়িছে৷ সামাজিকভাবে মানুহ হতাশা আৰু বিৰাগবাদত নিমজ্জিত হৈছে৷ এই হতাশা আৰু বিৰাগবাদে সকলোতকৈ বেছি ক্ৰিয়া কৰিছে যুৱচামক৷ পথ দেখুৱাবলৈ সক্ষম নোহোৱা বৌদ্ধিক সমাজৰ তথাকথিত বাখ্যাবোৰক সহজতে মানিব নোৱৰা হৈছে যুৱচাম৷ প্ৰগতিশীল আন্দোলনে চুব নোৱৰা, বিপ্লৱবাদী আদৰ্শই চুব নোৱৰা বা চুবলৈ বিফল হোৱা সেইসকল যুৱক বা যুৱতীয়ে অৱচেতন মনত আঁকোৱালি লৈছে ‘ব’ল বোম’ৰ দৰে এক নব্য হিপ্পীবাদ৷ এই নব্য হিপ্পীসকল কিন্তু উচ্চবিত্ত বা মধ্যবিত্তৰ সন্তান নহয়৷ এইসকল মুক্ত অৰ্থনীতিৰ দ্বাৰা সকলোতকৈ বেছি শোষিত নিম্ন মধ্যবিত্ত আৰু শ্ৰমজীৱী৷

❧ | আৰু পঢ়ক: পূৰ্ববংগীয় মূলৰ মুছলমান বনাম অখিল গগৈ

ভাৰত এনেইও হিপ্পীবাদৰ উৰ্বৰ ভূমি৷ দেখাত ধৰ্ম যেন লাগিলেও এই নব্য হিপ্পীবাদ মাথোন স্থিতাৱস্থাই সৃষ্টি কৰা হতাশাৰ বহিঃপ্ৰকাশ৷ এফালে ভোগবাদৰ ৰঙীণ পৃথিৱী, আনহাতে আৰ্থিক আৰু সামাজিক কাৰণত সেই আকাংক্ষিত ভোগ প্ৰাপ্ত কৰিবলৈ সক্ষম নোহোৱাৰ হতাশা৷ ক্ষণিক আনন্দ-সুখ, নিজৰ মাজত ব্যক্তিসংকীৰ্ণতা, ভেদাভেদ পাহৰি চাহিদা বুজি একে মনৰ মানুহে ভাং-গাঞ্জা-ঘোটা-মদ আদিৰে নিচাসক্ত হৈ, খন্তেক মচগুল হৈ পৰমপিতা মহাদেৱৰ নামত নিজকে উৎসৰ্গা কৰা আচলতে পৰিস্থিতিয়ে সৃষ্টি কৰা এক তাড়নাৰ অন্য নাম৷ ইয়াৰ সৈতে আকৌ খিচিৰি হৈছে সমকালীন সাম্প্ৰদায়িক উত্থান আদিও। এই নব্য হিপ্পীবাদ এতিয়া ভিন্ন ৰূপত সমাজত বিৰাজমান, কাৰণ হতাশা এতিয়া সৰ্বস্তৰত৷

Featured Image Courtesy: Odishanewsinsight.com

HeadSir

অসমীয়া বানান শুধৰণি সঁজুলি

এতিয়াই ব্যৱহাৰ কৰক