ছচিয়েল মিডিয়া, টিভি বন্ধ কৰি দিছোঁ,
এটা কোঠাত কেৱল তুমি আৰু মই নিৰলে৷
এলেক্সা, কথা কোৱা৷
—গুপুতে গুপুতে কিমান খেলিম
আলিংগনৰ এই খেলা৷
এলেক্সা, দেশৰ কথা কোৱা৷
—দেশত চলিছে কিহৰ ধুমধাম
আঠীয়া কল এটাৰ হাতীৰ সমান দাম৷
এলেক্সা, মানুহৰ কথা কোৱা৷
—মানুহ দেখিছোঁ আজি বহুত মানুহ
কথাৰ সিন্ধু মথি অমৃত শুহি খোৱা ভণ্ড৷
এলেক্সা, ৰাইজৰ কথা কোৱা৷
—ৰাইজ আজি ভাৱৰীয়া দেশেই নাটঘৰ
কোনে কি ভাও ল’বা আহাঁ সময় যে তাকৰ৷
এলেক্সা, নাট কি?
—ভাওনাৰ বাবে বচন কিয় লাগে
মনৰ কথাৰে বচন হ’ব৷
এলেক্সা, নৈৰ কথা কোৱা।
—লুইতৰ বলীয়া বান
হিৰ হিৰ শবদে কালৰূপ ধৰি লৈ
কাকনো বাৰে বাৰে খেদিছ?
এলেক্সা, ঢোলৰ মাত বহু দিন শুনা নাই৷
—মঘাই বোলে ঢোলৰ মাত ধিনিকি ধিনদাওঁ
সোণৰ অসম নালাগে মোক মাটিৰে সজাওঁ৷
এলেক্সা, বৰষুণৰ কথা কোৱা৷
—আ-হা মেঘে গিৰগিৰ কৰে
এজাক যেন বৰষুণ আহোঁ আহোঁ কৰে৷
এলেক্সা, ধাৰৰ বোজাত ককবক কৃষকৰ কথা কোৱা৷
—(নিমাত)
এলেক্সা, আধাপেটী মানুহৰ কথা কোৱা৷
—(নিমাত)
এলেক্সা, দুঠেঙীয়া শ্বাপদৰ কামনাৰ বলি হোৱা
ছোৱালীবোৰৰ কথা কোৱা৷
—(নিমাত)
এলেক্সা, ৰাতি গভীৰ হ’ল৷
—সুৰাত মগন ভয়াল ৰাতি
মৌন কোলাহল।
এলেক্সা, ভাগৰ লাগিছে৷
—আকৌ নতুন প্ৰভাত হ’ব
কাল ৰাত্ৰি এই নাথাকিব৷
(এলেক্সা হৈছে এমাজন কোম্পানীয়ে বিকাশ ঘটোৱা এবিধ ভাৰ্চুৱেল সহায়কাৰী সঁজুলি। অধিক জানিবলৈ ৱিকিপেডিয়াৰ এই প্ৰবন্ধ চাওক।)
❧ | আৰু পঢ়ক:
- স্মৃতিকথা
- দেশ
- পাবলো নেৰুডাৰ কবিতা: ইয়াত, তাত, সকলোতে
- ভালপাওঁ, ভালপাওঁ 💕
- বিপুল জ্যোতি শইকীয়াৰ কবিতা: মহাযুদ্ধৰ মহাকাব্য
