ন গাঁও চহৰৰ পৰা প্ৰায় পাঁচ কিলোমিটাৰ পূবলৈ, উৰিয়াগাঁও-ৰূপহী সংযোগী পথৰ দাঁতিৰ বৰদোঙা পথাৰত অৱস্থিত কৰৈয়নী অঞ্চল তথা ইয়াৰ পাৰ্শ্বৱৰ্তী কলংপাৰৰ এক বৃহৎ অঞ্চলক বিগত প্ৰায় ৬০ বছৰ ধৰি সামাজিক-সাংস্কৃতিক দিশত প্ৰতিনিধিত্ব কৰি অহা এক অনন্য অনুষ্ঠান হ’ল কলংপৰীয়া বাৰগঞা সমাজ। শ্ৰীশ্ৰীডোখোৰামুখ সত্ৰ, শ্ৰীশ্ৰীব্ৰহ্মচাৰী সত্ৰ, শ্ৰীশ্ৰীকৰচুং সত্ৰ, শ্ৰীশ্ৰীএলেঙী বালিসত্ৰ, শ্ৰীশ্ৰীশালমৰা সত্ৰকে কেন্দ্ৰ কৰি নামকৰৈয়নী, চলাপাৰ, পহুকটা, বৰুৱা চুবুৰি, নাম চুতীয়া, ওপৰ চুতীয়া, কলংপাৰ মৰঙিয়াল, পথাৰচুক মৰঙিয়াল, গধৰীয়া গাওঁ, গধৰীয়া কৰৈয়নী, মাজৰআটী, বামুণগাওঁ, পলাশনী আৰু পতিয়াআটী গাঁৱৰ প্ৰায় ৬০০ ঘৰ গৃহস্থীৰ হেঁপাহৰ, আদৰৰ তথা ভকতিৰ থল কলংপৰীয়া বাৰগঞা সমাজৰ সৰ্বজনীন হেজাৰী ভাওনা মন্দিৰৰ ইতিহাস বহু পুৰণি।
শংকৰী কলা-কৃষ্টিৰ চৰ্চা, নৃত্য-গীতৰ প্ৰদৰ্শন-প্ৰসাৰ-সংৰক্ষণ আৰু অংকীয়া ভাওনা প্ৰদৰ্শনক মূল লক্ষ্য হিচাপে লৈ ১৯৬৬ চনৰ এক শুভ ক্ষণত হেঙুলীচুক গাঁৱৰ বৰনামঘৰত ‘কলংপৰীয়া বাৰগঞা সমাজ’ নামৰ অনুষ্ঠানটি গঢ় লৈ উঠিছিল। পৰৱৰ্তী ১৯৬৭ চনৰ এক শুভ লগনত বৃহত্তৰ অঞ্চলটোৰ মধ্যস্থল বৰদোঙা পথাৰত (প্ৰয়াত) পদ্ম শইকীয়াই আগবঢ়োৱা ভূমিত সৰ্বজনীন হেজাৰী ভাওনা মন্দিৰ নিৰ্মাণৰ লক্ষ্যৰে সেই সময়ৰ নগাঁও জিলাৰ উপায়ুক্ত এছ পাৰ্থসাৰথিৰ দ্বাৰা লাইখুঁটা স্থাপন কৰা হয়। ৰাইজৰ হেঁপাহত ঠাইডোখৰ এক ঐতিহাসিক ক্ষেত্ৰত পৰিণত হ’ল। ৰাইজৰ উৎসাহত, সমিতিৰ বিষয়ববীয়াসকলে দুগুণ উৎসাহেৰে মন্দিৰৰ পৰিকল্পনা যুগুত কৰিলে আৰু সময়ত মন্দিৰৰ নিৰ্মাণ সম্পূৰ্ণ হৈ উঠিল। ৭ বিঘা ভূমিত স্থাপিত সাত খলপীয়া সিংহাসনেৰে এই মন্দিৰভাগ বৰ্তমান ভক্তসকলৰ তীৰ্থস্থান। সোণত সুৱগা চৰাই মন্দিৰৰ মাহাত্ম্য প্ৰচাৰৰ অৰ্থে ২০০৭ চনত পৱিত্ৰ বৰপেটা সত্ৰৰ পৰা অক্ষয় বন্তিৰ শিখা আনি মন্দিৰত প্ৰতিষ্ঠা কৰা কাৰ্যই যেন অঞ্চলটোলৈ পূৰ্ণ আলোক নমাই আনিলে।
একতাৰ এনাজৰী অধিক মজবুত কৰিবলৈ তথা গুৰুজনাৰ আদৰ্শেৰে অনুপ্ৰাণিত হ’বলৈ এই মন্দিৰ প্ৰতিষ্ঠা হোৱাৰ কালৰে পৰা প্ৰতি ৫ বছৰৰ মূৰে মূৰে হেজাৰী ভাওনা মহোৎসৱ অনুষ্ঠিত কৰি অহা হৈছে। প্ৰতিষ্ঠা কালৰে পৰা যোৱা বৰ্ষলৈকে এই সমাজৰ সভাপতিৰ আসন অলংকৃত কৰা শিক্ষাবিদ, শাস্ত্ৰজ্ঞ প্ৰসন্ন কুমাৰ গোস্বামী, বৰ্তমানৰ সভাপতি নবীন গোস্বামী, কাৰ্যকৰী সভাপতি ভুৱন শৰ্মাকে আদি কৰি সমূহ প্ৰাক্তন কৰ্মকৰ্তা, বৰ্তমানৰ প্ৰধান সম্পাদক দিলীপ বৰা, সহকাৰী সম্পাদকসকল আৰু কৰ্মকৰ্তাসকলৰ নিঃস্বাৰ্থ ত্যাগৰ বিনিময়ত আজি অনুষ্ঠানটোৱে হীৰক জয়ন্তীৰ গৌৰৱময় মুহূৰ্তত উপস্থিত হৈছে।
দ্বাদশ সংখ্যক হেজাৰী ভাওনা মহোৎসৱ (২০২৫)
এই বৰ্ষ (২০২৫)ত দৌল উৎসৱৰ লগত সংগতি ৰাখি কলংপৰীয়া বাৰগঞা সমাজ আৰু বাৰগঞা মহিলা সমিতিৰ যৌথ ব্যৱস্থাপনাত ১২ মাৰ্চৰ পৰা চাৰিদিনীয়া বৰ্ণাঢ্য কাৰ্যসূচীৰে দ্বাদশ হেজাৰী ভাওনা মহোৎসৱ আৰম্ভ হৈছে। হীৰক জয়ন্তী বৰ্ষত ভৰি দিয়া ভাওনা মহোৎসৱত বন্তি প্ৰজ্বলনৰ লগতে ধৰ্মধজ্জা উত্তোলন আৰু ভাওনা মহোৎসৱৰ পতাকা উত্তোলন কৰে ক্ৰমে উদযাপন সমিতিৰ সভাপতি তথা বিধায়ক ৰূপক শৰ্মা আৰু জ্যেষ্ঠ সাংবাদিক তথা অসমীয়া প্ৰতিদিনৰ সহযোগী সম্পাদক প্ৰকাশ মহন্তই। হীৰক জয়ন্তী বৰ্ষ উপলক্ষে অঞ্চলটোৰ স্থানীয় আৰু আমন্ত্ৰিত ব্যক্তিসকলৰ দ্বাৰা ৬০খন পতাকা উত্তোলন কৰা হয়। প্ৰাক্তন মন্ত্ৰী গিৰীন্দ্ৰ কুমাৰ বৰুৱাই স্মৃতিচাৰণ অনুষ্ঠানৰ শুভাৰম্ভ কৰাৰ অন্তত নৱনিৰ্মিত বাটচ’ৰা উন্মোচন কৰে অৱসৰপ্ৰাপ্ত শিক্ষক তথা বিশিষ্ট সমাজকৰ্মী পুলিন হাজৰিকাই।
মন্দিৰত নৱনিৰ্মিত দুখন শৰাই উন্মোচন কৰে অসমীয়া প্ৰতিদিনৰ সহযোগী সম্পাদক প্ৰকাশ মহন্ত আৰু সমাজকৰ্মী সুৰেশ বৰাই। ইয়াৰ পাছতে দৃষ্টিনন্দন সাংস্কৃতিক শোভাযাত্ৰা উদ্বোধন কৰে বিশিষ্ট অভিনেতা অৰুণ হাজৰিকাই। বাৰগঞা মন্দিৰৰ আৰম্ভ কৰি অঞ্চলটোৰ ১৬খন গাঁৱৰ মাজেৰে পৰিভ্ৰমণ কৰা উক্ত শোভাযাত্ৰাত বাৰগঞা মন্দিৰৰ প্ৰতীক, ভাগৱতৰ লগতে গুৰুজনাৰ অনৱদ্য কৃষ্টি গায়ন-বায়নৰ জোৰা, দিহানামৰ দল, ৰাসলীলা, অংকীয়া ভাওনাৰ বিভিন্ন দৃশ্য, গুৰু দুজনাৰ অপূৰ্ব সৃষ্টি নামসিংহ, আয়তীৰ পানী তোলা, বিয়ানাম, বিহুনাচ, কৃষি কৰ্ম আদি প্ৰদৰ্শন কৰা হয়। সাংস্কৃতিক শোভাযাত্ৰাত বিশিষ্ট অভিনেতা অৰুণ হাজৰিকা, দীপজ্যোতি কেওট (মোহন), ৰিণ্টুমণি বৰা (ৰাকেশ), পৱন মহন্ত, ৰাজেন ফুকন, নাট্যকাৰ নৱজ্যোতি বৰাকে ধৰি কেইবাগৰাকী শিল্পী-কুশলীয়ে অংশগ্ৰহণ কৰে। ১৪ মাৰ্চৰ দুপৰীয়া ১ বজাত অনুষ্ঠিত হ’বলগীয়া মুকলি সভাত স্মৃতিগ্ৰন্থ ‘কৰাপাট’ উন্মোচন কৰে অসম সাহিত্য সভাৰ উপ সভাপতি পদুম ৰাজখোৱাই।
ভাওনা মহোৎসৱত মুঠ ৩৩খন অংকীয়া ভাওনা প্ৰদৰ্শন কৰা হ’ব। ইতিমধ্যে ভাওনা মহোৎসৱক লৈ অঞ্চলটোৰ লগতে জিলাখনত এক উৎসৱমুখৰ পৰিৱেশৰ সৃষ্টি হৈছে। ১৫ মাৰ্চৰ দিনা মহোৎসৱথলীত শিশু অনুষ্ঠান ‘জ্যোতিষ্ক’ৰ উদ্যোগত শিশুৰ দিন হিচাপে উদযাপন কৰা হ’ব। দিনজোৰা কাৰ্যসূচীৰে অনুষ্ঠিত হ’বলগা শিশু সমাৰোহখনিত ‘সকলোৱে পাবা পুৰস্কাৰ’ লক্ষ্যৰে কবিতা আবৃত্তি, অসমীয়া বানান, সাধুকথা, ছবি অঁকা আদি প্ৰতিযোগিতা অনুষ্ঠিত হ’ব। উক্ত দিনাই শিশু আলোচনী ‘জ্যোতিষ্ক’ ৰ তৃতীয় সংখ্যা উন্মোচন হ’ব। নিশালৈ সাংস্কৃতিক সন্ধিয়া আৰু ‘জ্যোতিশিল্প’ নাট্যদলৰ নাটক ‘বলুকাত বিয়লি বেলা’ মঞ্চস্থ হ’ব। ১৬ মাৰ্চৰ অন্তিম দিনা দিনত শিশু শিল্পীৰ দ্বাৰা প্ৰতি ৰভাত অংকীয়া নাট মঞ্চস্থ কৰা হ’ব। নিশালৈ অনুষ্ঠিত হ’ব কেলিগোপাল নাট।
❧ | আৰু পঢ়ক:
