১
এতিয়া পৃথিৱী শুইছে
সাৰে আছে আকাশ বতাহ আৰু অভিলাস
দশমীৰ জোনে উদ্ভাসিত কৰিছে চৌপাশ,
ক্লান্ত শৰীৰবোৰ পৰি আছে য’তে-ত’তে
মনবোৰ ওলাই আহিছে বাহিৰলৈ
জুমি জুমি তৰাবোৰ চাইছে কিছুমানে।
মই মোৰ সৈতে ব্যস্ত হৈছোঁ
পোৱা-নোপোৱাৰ হিচাপত।
২
ক্রমে গভীৰ হৈছে নিশা,
অহৰহ সুগন্ধি বিলাই ক্লান্তিত জিৰণি লৈছে
শেৱালিবোৰে,
বিদায়ৰ সময় সমাগত বুলি
নিয়ৰে কেৱল চকুলো টুকিছে।
৩
ক্লান্ত নিশাহত অপ্রাপ্তিৰ হুমুনিয়াহ
বেদনাদগ্ধ হৃদয়ত মুক ক্রন্দন।
গুজৰি-গুমৰি আছে আহত মেঘবোৰে
তৰাবোৰ শুই আছে নিৰৱে,
যন্ত্রণাক্লিষ্ট জোনটোৱে কেৱল নাও বাইছে
অকলশৰে।
৪
গছবোৰ মৌন
কর্তব্যইতো জীৱন,
ত্যাগৰ মহত্ত্বই দিয়ে জীয়াই থকাৰ সম্বল।
চকুপানীৰ মূল্য কাক বিচাবিব?
নিৰৱে আহ্বান সাহস আৰু সহ্যৰ…
❧ | আৰু পঢ়ক:
- দেশ এখন কিনিব বিচাৰোঁ
- ব্যৰ্থ প্ৰেম
- বিপুল জ্যোতি শইকীয়াৰ কবিতা: মহাযুদ্ধৰ মহাকাব্য
- এখনি অকলশৰীয়া নাও
- কুঁৱৰ নাৰায়ণৰ কবিতা: কাফ্কাৰ প্ৰাগত
ফিচাৰড্ ইমেজ: ভিনচেণ্ট ভেন গগ’ৰ পেইণ্টিং ‘দ্য ষ্টেৰি নাইট’
