এ খন অনলাইন শিশু আলোচনী প্ৰকাশ পাইছে। শিশু মনক অনুপ্ৰাণিত কৰা তথা শিকন আৰু সৃষ্টিশীলতাৰ প্ৰতি অনুৰাগ গঢ়ি তোলাৰ লক্ষ্যৰে আৰম্ভ কৰা ‘কাণখোৱা’ নামৰ এই অনলাইন শিশু আলোচনীখনৰ যোৱা ২৪ জুন তাৰিখে উন্মোচন হৈ যায়। অনলাইন মাধ্যমতে আলোচনীখনৰ উন্মোচন কৰে লেখক-সাংবাদিক মৃদুল কুমাৰ সন্দিকৈয়ে। আলোচনীখনৰ প্ৰসংগত সন্দিকৈয়ে কয়— “কাণখোৱা নামৰ অকণিহঁতৰ বাবে প্ৰকাশ কৰা অনলাইন আলোচনীখন যিয়েই এবাৰ দৰ্শন কৰিছে, তেওঁ অনুভৱ কৰিব কিমান সৰ্বাংগসুন্দৰ ৰূপত অতি দায়িত্বসহকাৰে আৰু দায়বদ্ধতাৰে শিশুৰ বাবে এই কাম কৰা হৈছে। এই অনলাইন আলোচনীখনৰ প্ৰতিটো লেখা আগ্ৰহেৰে পঢ়াৰ পাছত এই কথা ক’ব পাৰি যে সময়ৰ সৈতে খোজ মিলাই এনে এখন অনলাইন শিশু আলোচনীৰ প্ৰয়োজনীয়তাকেই যেন সকলোৱে অনুভৱ কৰি আহিছিল।” লেখক সন্দিকৈয়ে আলোচনীখনৰ কথাৰে অসমীয়া প্ৰতিদিনৰ ডিজিটেল সংস্কৰণত এটি বিস্তৃত লেখাও লিখিছে।
ৱেবচাইটটোৰ গৃহপৃষ্ঠাৰ একাংশ
ডিজিটেল যুগত শিশুৰ কল্পনাশক্তিক লালন-পালন কৰা আৰু ইতিবাচক তথা শিক্ষামূলক বিষয়বস্তু প্ৰদানত গুৰুত্ব দিব বিচৰা আলোচনীখনত শিশু মনৰ খোৰাক যোগাব পৰাকৈ পদ্য-কবিতা, সাধু-গল্প, জানো আহাঁ, অংশগ্ৰহণ কৰিব পৰা কুইজ, শিশুৰ লেখা, ছবি, ভিডিঅ’ আদিৰ সংযোজন কৰা হৈছে। আলোচনীখনৰ প্ৰসংগত ইতিমধ্যেই বিশিষ্ট সাহিত্যিক ৰঞ্জু হাজৰিকা, শিশু আলোচনী ‘মৌচাক’ আৰু ‘নতুন আৱিষ্কাৰ’ৰ সম্পাদক শান্তনু তামুলী, শিশু সাহিত্যিক নূপুৰ মোমাইদেৱে আশাবাদ পোষণ কৰিছে আৰু তেখেতসকলৰ অভিমত ৱেবচাইটটোত সংযোজিত হৈছে।
https://kankhowa.in ঠিকনাত উপলব্ধ হোৱা শিশু আলোচনীখনৰ বাবে শিশুৰ লেখা, ছবি তথা শিশু উপযোগী লেখা-মেলা [email protected] ইমেইল ঠিকনাত প্ৰেৰণ কৰিব পাৰিব বুলি উদ্যোক্তাসকলে জনাইছে। অসমৰ ভিন্ন প্ৰান্তৰ কেইবাগৰাকীও লেখক-সাহিত্যিক জড়িত থকা ‘কাণখোৱা’ আলোচনীখনৰ মুখ্য সম্পাদক ৰূপে আছে পল্লৱপ্ৰাণ গোস্বামী (নীলা চৰাইৰ সম্পাদক) আৰু পৰিচালন সম্পাদক ৰূপে আছে দুলাল বৰা।
❧ | আৰু পঢ়ক:
