সোণালী সূতাৰ গাঁওখন দাউ দাউকৈ জ্বলিছে

(শুৱালকুছিৰ ৰাইজৰ হাতত)

(চিৰা-পিঠা, জেতুকা নালাগে।
ৰাইজে এইবাৰ পোৰা কলিজাৰে পাতিব বিহু!)
xonali-xuta

বিশ্বাস আৰু অবিশ্বাসত বাদুলি ওলমা দিছে মনবোৰে

কঁকালৰ গামোচা পুৰি ছাঁই হ’ল
পচোৱা বতাহত হুমুনিয়াহে ফাকু খেলে

সোণালী সূতাৰ গাঁওখন দাউ দাউকৈ জ্বলিছে
শুকান নৰা হৈ জ্বলিছে সপোন
ডেকেৰুৱা হৃদয়বোৰ এফালৰ পৰা পুৰিছে
বহাগ শাওপাত হ’ল।

ধোঁৱাৰে ক’লা হ’ল সোণালী গাঁৱৰ আকাশ
মানুহে হেৰুৱাইছে ভাত
আধা পোৰা মাকোবোৰ থৰ হ’ল
চকুপানীৰ হৈছে হাট।

সপোন বোটলা নিপুণ হাতবোৰ
তেজেৰে ফুটুকা-ফুটুকি
বাই-ভনী আইৰ গাত কেচেমা-কেচেম গোন্ধ
ঘামৰ নদীৰে বৈ যায় তেজ।

এৰা, জুই আৰু তেজ
ওৰণিৰ তলত
ৰিহাৰ আঁচলত।
পিতাইৰ কামিজত বুলেটৰ চাৰিটা ফুটা।

কুহিলা যেন বুকুবোৰ শিল হৈ পৰিছে
ওঁঠবোৰে হেৰুৱাইছে গান
ঔ-ফুলীয়া গালবোৰ ফাটি-চিটি ৰঙা হ’ল
বহাগোচোন শীত হৈয়ে ৰ’ল।

মুগা ৰিহা কোনে দিব নাচনীক
সোণোৱালী সূতাবোৰে হেৰুৱালে আঁত
বাতি কঢ়াতে জয় পৰিল বিহুৱতী তাঁত
তেজেৰে ৰাঙলী হ’ল বহাগৰ বাট।

সোণালী সূতাৰ গাঁওখন দাউ দাউকৈ জ্বলিছে
শুকান নৰা হৈ জ্বলিছে সপোন

বিশ্বাস আৰু অবিশ্বাসত বাদুলি ওলমা দিছে মনবোৰে

আপোনাৰ আৰু ভাল লাগিব পাৰে:

AKCA-BRabha-Cover150x80

আমাৰ ই-মেইল তালিকাত যোগ দিয়ক আৰু বিনামূলীয়াকৈ ই-বুক লাভ কৰক !


আমাৰ ই-মেইল তালিকাত যোগ দিয়ক আৰু প্ৰীতিৰ চিন স্বৰূপে বিষ্ণুপ্ৰসাদ ৰাভাৰ 'অসমীয়া কৃষ্টিৰ চমু আভাস' ই-বুক (ই-পাব/ মবি/ পিডিএফ) ৰূপত পাওক বিনামূল্যে !

আমি আপোনাৰ ই-মেইল ঠিকনা নিশ্চিত কৰিব লাগিব। আমি এইমাত্ৰ আপোনালৈ এটা ইমেইল প্ৰেৰণ কৰিছোঁ; সেই ইমেইলত দিয়া লিংকত ক্লিক কৰি আপোনাৰ চাবস্ক্ৰিপশ্যন প্ৰক্ৰিয়া সম্পূৰ্ণ কৰক।

Leave a Reply

1 Comment on "সোণালী সূতাৰ গাঁওখন দাউ দাউকৈ জ্বলিছে"

avatar
Sort by:   newest | oldest | most voted
trackback

[…] …মুগা ৰিহা কোনে দিব নাচনীক সোণোৱালী সূতাবোৰে হেৰুৱালে আঁত বাতি কঢ়াতে জয় পৰিল বিহুৱতী তাঁত তেজেৰে ৰাঙলী হ’ল বহাগৰ বাট।… via Facebook http://www.nilacharai.com/xonali-xutar-gaonkhan/#.UWqDk4RW0Jg.facebook […]

wpDiscuz