নাৰীৰ বিষয়ে কিছুমান সাহসী মন্তব্য

[ লীলাধৰ বৰা ]

The Knitting Woman painting by William-Adolphe Bouguereauস্পেনিচ লেখক চাৰ্ভেণ্টিছে এজন সাধাৰণ পুৰুষৰ দৃষ্টিভঙ্গীৰে অভিমত দিয়ে যে সকলো নাৰীয়েই ভাল, কিন্তু তাৰে ভিতৰত কিছুমান অকৰ্মন্য আৰু কিছুমান দুই-এটি বিশেষ কামৰ বাবেহে। জেন আস্তিনে কয় যে যেতিয়া এগৰাকী নাৰীয়ে সকলো জানো বুলি কয় তেতিয়া তাক গোপনে ৰখাই উচিত। অস্কাৰ ৱাইল্ডৰ পৰা মহান নাট্যকাৰ শ্বেইক্সপীয়েৰলৈকে বেছিভাগে নাৰীৰ সপক্ষে কোৱাতকৈ বিৰুদ্ধেহে কয়।

সাধাৰণতে নাৰী অনেক সমালোচনাৰ সন্মুখীন হ’বলগীয়া হয়। চেমুৱেল বাটলাৰৰ মতে— দস্যুৱে তোমাৰ ধন-সোণ বা জীৱন দাবী কৰে আৰু নাৰীয়ে সেই দুয়োটাকে দাবী কৰে। তেওঁ আকৌ সংযত হৈ ক’ব খোজে— যদি ঈশ্বৰে নাৰীক পুৰুষৰ সহায়কাৰী বুলি গণ্য কৰে, তেনেহ’লে তেওঁক পুৰুষৰ বিষয়ে হীন মন্তব্য দিয়া বুলি ক’ম। 

কংগ্ৰিভে ৰসিকতা কৰি নাৰীক উপদেশ দিয়াৰ চলেৰে কয়— তুমি নাৰী, তুমি ভবা কোনো কথা কেতিয়াও নক’বা। তোমাৰ কথা তোমাৰ ভাবৰ বিপৰীতে যাব বা তোমাৰ কাম তোমাৰ কথাৰ বিপৰীতে যাব।

আলেকজেণ্ডাৰ ডুমাই অনুভৱ কৰে যে যি নাৰীয়ে প্ৰায়ে আমাক মহৎ কাম সম্পাদন কৰিবলৈ অনুপ্ৰেৰণা যোগায়, সেই নাৰীয়েই আকৌ সেই কাম সম্পূৰ্ণ কৰাত বাধাও জন্মায়। হলি বাৰ্টনে কয় যে প্ৰতিগৰাকী নাৰী নকন্দালৈকে শুদ্ধতকৈ দোষীহে। জৰ্জ ইলিয়টে তেওঁক সমথৰ্ন কৰি কয় যে নাৰীয়ে একে সময়তে দুটা চিন্তা কৰে আৰু সেই চিন্তা পাছত হ’বগৈ পাঁচটা, যদিহে কান্দি থাকে বা বিৰক্ত হয়।

ডন হেৰল্ডে স্বীকাৰ কৰে যে নাৰীয়ে আমাক শান্তি আৰু সুখ দিয়ে, কিন্তু লগতে কয় যে যদি সেইটো নাৰীৰ বাবে নহ’লহেঁতেন, আমি শান্তি বিচৰাৰ আৱশ্যকেই নহ’লহেঁতেন। লেডি মণ্টেগুৱে অভিমত দি কয়— নাৰী হৈ মই ভাবোঁ যে মই এজন পুৰুষ বিয়া কৰাই বিপদত নপৰোঁ। দাৰ্শনিক নিৎচেই বিৰক্তিৰ ভাবেৰে কয় যে নাৰী আছিল ভগৱানৰ দ্বিতীয় ভুল। প্ৰথম ভুল পুৰুষ আছিল নেকি— এই চিন্তা কৰিলে আমি বিমোৰত পৰোঁ। নাৰীৰ ধৰ্মজ্ঞান সমালোচনা সাপেক্ষ। চফি আৰ্নল্ডে দাবী কৰে যে নাৰীয়ে কেৱল তেতিয়াহে ঈশ্বৰত নিজকে অপৰ্ণ কৰে, যেতিয়া চয়তানে তেওঁলোকৰ পৰা বিশেষ একো নিবিচাৰে।

নাৰীৰ চঞ্চলতাই চাৰ্ভেণ্টিছৰ চিন্তাৰ বিষয়, কিয়নো তেওঁ কয় যে নাৰীৰ ‘হয়’ আৰু ‘নহয়’ৰ মাজত মই কোনোটোতে গুৰুত্ব নিদিওঁ। নিজৰ ৰূপ সম্পৰ্কে নাৰীৰ ভয়ানক দুৰ্বলতাৰ কথা কৈ চেমফৰ্টে কয় যে যদি এগৰাকী নাৰী ফাঁচীকাঠত ওলমিবলৈ আগবাঢ়ে, সেই সময়তো তেওঁ মুখত প্ৰসাধন কৰিবৰ বাবে কিছু সময় হ’লেও বিচাৰিব।

নাৰীৰ অতি কথকী গুণৰ বিষয়ে ক’বলৈ গৈ চাপমেনে মন্তব্য দিয়ে যে এজন পুৰুষৰ অন্তৰ মৃত্যুৰ সময়ত ব্যাকুল হয়, কিন্তু নাৰীৰ ব্যাকুল হয় জিভাখনহে। মেৰী লিটনে লগতে কয় যে নাৰীৰ এটা ডাঙৰ স্বভাৱ হ’ল মৌনতা পছন্দ নকৰাটো।

এডহৱে অনুভৱ কৰে যে এই পৃথিৱীত এটা বৰ জটিল সমস্যা হ’ল নাৰীক বুজুৱাটো; তাতো যেন ধন-সোণ লাগিব। তেওঁলোকৰ নাৰীসুলভ নিৰ্বুধিতা ইমান স্পষ্ট যে চেমুৱেল জনচনৰ মতে, নাৰীৰ মুখত ধৰ্মবাণী কুকুৰে পাছঠেঙত ভৰ দি খোজ কঢ়াৰ দৰে হাস্যাস্পদ।

ডগলাচ জেৰল্ডে নাৰীৰ সকলো বদনামৰ বিৰুদ্ধে ঠিয় হৈ কয় যে প্ৰতিটো গোলাপতে কাঁইট আছে, কিন্তু তাৰ লগতে ক’ব খোজে যে আমি জিনজিননি বা সিৰসিৰণি অনুভৱ নকৰা নাৰী পোৱা অসম্ভৱ।

চামফৰ্টৰ মতে, এগৰাকী ধুনীয়া নাৰী পুৰুষৰ চকু দুটিৰ বাবে স্বৰ্গ, আত্মাৰ বাবে নৰক আৰু ধন-সোণৰ বাবে বিশাল গহ্বৰ। এমব্ৰছ বিয়াৰ্চে অভিমত দিয়ে যে আমি পুৰুষসকল নাৰীৰ হাতৰ মুঠিত নোসোমোৱালৈকে তেওঁলোকৰ দুবাহুৰ মাজত সোমোৱাটো অসম্ভৱ কথা।

বালজাকে নাৰীৰ সংস্পৰ্শলৈ যোৱাৰ আগতে আমাক সাৱধান কৰি কয় যে নাৰীয়ে যেতিয়া এজন পুৰুষক ভেৰা কৰি লয়, তেতিয়া তেওঁ সদায় এটা কথা কয় যে তেওঁ এক দুৰ্দান্ত মনৰ সিংহস্বৰূপ ব্যক্তি। ডুগলাচ এনিচালিয়ে দুখেৰে কয় যে তোমাৰ প্ৰতি সত্য-শুদ্ধ হ’লেও নাৰীক কেতিয়াও বিশ্বাস নকৰিবা।

আৰভিন কবে সাৱধান কৰি ক’ব খোজে যে নাৰীয়ে বিৰাট ওক গছৰ সমান সকলো ক্ষমতা পাব বিচাৰে আৰু বিচাৰে ওলোমাই ৰখা আটাইবিলাক আঙুৰৰ থোপা। চাৰ্লচ স্পাৰ্জনে সাৱধান কৰি কয় যে ঘোঁৰাৰ পাছঠেং, কুকুৰৰ দাঁত আৰু নাৰীৰ জিভাখনৰ পৰা সাৱধানে থাকিব লাগে।

নিক্সন দি লেংক্লচে নাৰী হৈয়ো কয় যে নাৰীৰ সৰলতাত আমি যাতে ঠগ নাখাওঁ। তেওঁ দাবী কৰে যে নাৰীৰ আপত্তিমূলক স্বভাৱ তেওঁৰ প্ৰকৃত স্বভাৱৰ সাক্ষ্য নহয়, সেয়া তেওঁলোকৰ চিৰন্তন অভিজ্ঞতাৰহে ফলশ্ৰুতি।

ডেভিচে এক ডাঙৰ সিদ্ধান্ত আগবঢাই কয় যে নাৰীৰ পিছে পিছে দৌৰি অন্য জনক খুন্দা নামাৰিবা; তেওঁক ধৰিব পাৰিলেও তেওঁ তোমাৰ ক্ষতিহে কৰিব। অৱশ্যে আমেৰিকাৰ অভিনেতা জন বেৰিমুৰে তাৰ পৰা উদ্ধাৰ পোৱাৰ এটা উপায় দিছে। তেওঁ কৈছে, নাৰীৰ লগত যুঁজ দিব খুজিলে টুপিটোৰে যুঁজ কৰা আৰু পাছত টুপিটো হাতত লৈ তাৰ পৰা আঁতৰি পলোৱা।

অস্কাৰ ৱাইল্ডে এক চোকা মন্তব্য দিছে যে যিমান দিন এগৰাকী নাৰীয়ে নিজৰ জীয়েকতকৈ দহ বছৰৰ সৰু যেন দেখুৱাব পাৰে, সিমান দিন তেওঁ সন্তুষ্টি লাভ কৰে।

শ্বেইক্সপীয়েৰৰ মতে, দুগৰাকী নাৰীক এঠাইত লগ কৰি দিলে পৰিৱেশেই গোমা কৰি দিব। হৌচেজে দাবী কৰে যে নাৰী অবুজ আৰু যুক্তিহীন। তেওঁ ক্ষমা খোজে তেতিয়া, যেতিয়া তেওঁ নিজে দোষত পৰে। চাৰ কম্পটন মেকেঞ্জীয়ে কয় যে নাৰীয়ে এতিয়া পুৰুষৰ দৰে ব্যৱহাৰ কৰিবলৈ টান নাপায়, কিন্তু টান পায় ভদ্ৰ লোকৰ দৰে ব্যৱহাৰ কৰিবলৈ। হেনৰিক হেইনে কয় যে নাৰীৰ চৰিত্ৰ বুলি কোনো কথা নাই, কিয়নো তেওঁলোকে প্ৰতিদিনেই নতুন ৰূপ পৰিগ্ৰহ কৰিব পাৰে।

চামফৰ্টে গুৰুত্বসহকাৰে কয় যে নাৰী ছাঁৰ দৰে,— তুমি তেওঁৰ পিছ লোৱা, তেওঁ পলাই যাব আৰু তুমি পলোৱা, তেওঁ তোমাৰ পিছ ল’ব।

চেষ্টাৰ্টনে দাবী কৰে যে নাৰীয়ে সাম্য, মৈত্ৰী আৰু স্বাধীনতাৰ কথা বুজিব নোৱাৰে। জেমচ বেৰীয়ে নাৰীৰ অতিপাত হাঁহি-খিকিন্দালি লক্ষ্য কৰি ক’ব খোজে যে নাৰী ভগৱানৰ কামিহাড়েৰে তৈয়াৰী হোৱা নাছিল তেওঁলোক বাস্তৱিকতে তৈয়াৰী হৈছিল কিলাকুটিৰ হাড়েৰেহে।

নাথানিয়েল গুবিনে দুখেৰে ক’ব খোজে যে তিনি ডোখৰ ঠাইত নাৰী পৰিত্যা— ক্লাবঘৰ, মঠ-মন্দিৰ আৰু সমাধিস্থল। কিন্তু আৰ্নল্ড বেনেটে নাৰীক সমৰ্থন কৰি কয় যে এইটো গভীৰ সত্য যে লিংগ হিচাপে নাৰী মিছা আৰু তাৰ বিপৰীত লিংগ হিচাপে পুৰুষো মিছা।

জোচেফ কনৰাডে নাৰীৰ সপক্ষে কয় যে নাৰী হিচাপে এইটো এটা জটিল কাৰবাৰ যে নাৰীয়ে সদায় পুৰুষৰ লগতে সম্পৰ্ক ৰক্ষা কৰি চলিব লাগে। হান্না কউলিয়ে নাৰী জাতিৰ বিষয়ে কয় যে নাৰী প্ৰকৃতিৰ সুন্দৰ ভুলবিলাকৰ ভিতৰৰে এটা ভুল। দাও হেৰল্ডে কয় যে নাৰীয়েই বেছি ভুল নকৰে, কাৰণ তাতোকৈ ডাঙৰ ভুল কৰা প্ৰাণী পৃথিৱীত অনেক আছে। সৰ্বশেষত পুৰুষে সান্ত্বনা ল’ব পাৰে ডব্লিউ এচ গিলবাৰ্টৰ এই সাৰুৱা কথাষাৰেৰে— “In all the woes that curse our race, there is a lady in the case”। এই কথা সত্য যে সংসাৰৰ সকলো দুখ-যাতনাত মানৱ জাতিক শান্তিৰ শীতল ছাঁয়াত ৰাখিব পাৰে কেৱল নাৰীয়েহে।

আধাৰ: শশী থাৰুৰৰ প্ৰবন্ধ ‘Some Manly Thoughts on Women’
ছবি: The Knitting Woman painting by William-Adolphe Bouguereau, উৎস: উইকিমেডিয়া কমন্স

আপোনাৰ আৰু ভাল লাগিব পাৰে:

AKCA-BRabha-Cover150x80

আমাৰ ই-মেইল তালিকাত যোগ দিয়ক আৰু বিনামূলীয়াকৈ ই-বুক লাভ কৰক !


আমাৰ ই-মেইল তালিকাত যোগ দিয়ক আৰু প্ৰীতিৰ চিন স্বৰূপে বিষ্ণুপ্ৰসাদ ৰাভাৰ 'অসমীয়া কৃষ্টিৰ চমু আভাস' ই-বুক (ই-পাব/ মবি/ পিডিএফ) ৰূপত পাওক বিনামূল্যে !

আমি আপোনাৰ ই-মেইল ঠিকনা নিশ্চিত কৰিব লাগিব। আমি এইমাত্ৰ আপোনালৈ এটা ইমেইল প্ৰেৰণ কৰিছোঁ; সেই ইমেইলত দিয়া লিংকত ক্লিক কৰি আপোনাৰ চাবস্ক্ৰিপশ্যন প্ৰক্ৰিয়া সম্পূৰ্ণ কৰক।

সম্পাদক

সম্পাদক

editor@nilacharai.com

Leave a Reply

Be the First to Comment!

avatar
wpDiscuz