গহনা
প্ৰকাশ: ১৫ মাৰ্চ, ২০১২ | অন্তিম সম্পাদনা: ২১ জুন, ২০২১
মোৰ বাবে সাতসৰী গঢ়াই
ভগা সপোনৰ টুকুৰা নুবুটলিবা
আইতাই মোক তাহানিতে কৈছিল
জোনবিৰি পিন্ধিলে মোক বৰ শুৱনি দেখি
দেউতাই পিন্ধাব খুজিছিল কেৰু
মায়ে আকৌ দুগদুগীহে পছন্দ কৰিছিল
নেজেপতা, গলপতা, মুঠিখাৰু, থুৰীয়া—
কিমান যে অলংকাৰেৰে ঠাহ খাইছিল
এনাইদেউৰ পেৰা
খুব মন গৈছিল থুৰীয়া পিন্ধি
খুন্দা তামোলৰ সেলেঙী বোৱাই শৰতৰ চোতালত
আইতাই কোৱাৰ দৰে সাধুকথাৰ পোহাৰ মেলিবলৈ
তিনিখনীয়া কাপোৰ পিন্ধি গৃহিনী হ’বলৈ
কিন্তু হায়!
কঁকালত ৰিহাখনি মেৰিয়াই গাভৰু হওঁতে
চকুত অগাদেৱা কৰা
সোণালী সপোনবোৰ যে হেৰাই থাকিল!
বানে ধুৱাই নিয়া দুপৰীয়াটিত
সপোনৰ জপাটো উটি গৈ
চতিয়নাজোপাৰ ডালত উঠি থাকিল
জপাটো কোনোদিনেই নমাব নোৱাৰিলো
গছজোপা ক্ৰমাৎ ওখ হৈ গৈ থাকিল
গৈ থাকিল
নতুন গহনা পিন্ধাই পুনঃ সপোন দেখুৱাবলৈ
মোৰ কাষত যে এতিয়া আইতাও নাই
এনাইদেউও আঁতৰি গ’ল আকাশত তৰা হ’বলৈ
ভগা সপোনৰ টুকুৰা বুটলি
মোৰ বাবে সাতসৰী নগঢ়াবা
আজিকালি বনফুলেৰেই নিজকে সজাব শিকিছোঁ
চোৱাচোন খৰিকাজাঁইৰ কণ্ঠহাৰেৰে
কিমান শুৱনি লাগিছে মোক,
বোধহয় তুমি দেখুৱাব খোজা সপোনটোতকৈও!
লেখকৰ ঠিকনা:
গুৱাহাটী, ই-মেইল: [email protected]
নীলা চৰাই . মাৰ্চ ২০১২
আপোনালৈ সেৱা আগবঢ়োৱাৰ ক্ষেত্ৰত ‘নীলা চৰাই’ক আপুনিও সহায় কৰিব পাৰে। আপোনাৰ আৰ্থিক বৰঙণিৰে এই যাত্ৰাৰ সহযাত্ৰী হওক।
UPI-ৰ জৰিয়তে বৰঙণি আগবঢ়াবলৈ
Secure payment | PhonePe, Google Pay, Amazom Pay, Paytm
আৰ্থিক সহযোগিতাৰ বাহিৰে আপুনি এই লেখা সামাজিক মাধ্যমত শ্বেয়াৰ কৰিও আমাক সহায় কৰিব পাৰে। ওপৰৰ ফেচবুক/টুইটাৰ বাটনত ক্লিক কৰি লেখা শ্বেয়াৰ কৰিব পাৰিব।
.
One response to “গহনা”
-
ধুনীয়া কবিতা।
আপোনালৈ সেৱা আগবঢ়োৱাৰ ক্ষেত্ৰত ‘নীলা চৰাই’ক আপুনিও সহায় কৰিব পাৰে। আপোনাৰ আৰ্থিক বৰঙণিৰে এই যাত্ৰাৰ সহযাত্ৰী হওক।
UPI-ৰ জৰিয়তে বৰঙণি আগবঢ়াবলৈ স্কেন কৰক:
Secure payment | Powered by UPI
আৰ্থিক সহযোগিতাৰ বাহিৰে আপুনি এই লেখা সামাজিক মাধ্যমত শ্বেয়াৰ কৰিও আমাক সহায় কৰিব পাৰে। ওপৰৰ ফেচবুক/টুইটাৰ বাটনত ক্লিক কৰি লেখা শ্বেয়াৰ কৰিব পাৰিব।
Leave a Reply