ফুটপাথৰ জীৱন

[ চন্দ্ৰমা কলিতা ]

তন্দ্রালস নিশাবোৰ সিহঁতৰ
সপোনে বুটা বাছি সজাই নোতোলে
ৰঙা বেলিটোৱে আল্পনা আঁকিবলৈ কিন্তু
সিহঁতৰ পজাঁবোৰত সুৰুঙাৰ অভাৱ নাথাকে।

জহকালিৰ উত্তাপ সাৱটি অভ্যস্ত হোৱা সিহঁতৰ বাবে
বৰষুণ কেতিয়াও কবিতা নহয়,
জুপুৰিৰ তলৰ আভিমানবোৰ য’ত
জীৱনৰ দিয়া-নিদিয়াৰ ধেমালিত ভিজি ৰয়।
চেঁচা শেতেলিত যেতিয়া নিদ্রাহীনতাই উচুপে,
আভিজাত্যৰ উমত লহপহীয়া হোৱা গৌৰৱেৰে
সিহঁতে ক’ব নোৱাৰে
শীত প্রিয় ঋতু এটাৰ এক অনন্য অভিন্ন নাম।

নগ্ন শৈশৱ
আহত কৈশোৰimage
ভগ্ন যৌৱন
আৰু ক্ষুধার্ত মৃত্যু একোটিত সহজে শেষ হয়
মৰুভুমিময় ৰুক্ষ জীৱন।

সিহঁতৰ স্থবিৰ জীৱনৰ ইতিহাস একোটিত
এটুকুৰা ৰুটি, এখন কাপোৰেই
অমিয়া মধুৰ শব্দৰ চানেকি হয়
নিশ্চিন্ত আৰু নিৰাপদ আশ্রয় এটিয়েই
সিহঁতৰ সপোনৰ ঘৰখন নাম পায়।

ছবিঃ ক্ৰিয়েটিভ কমন্স এট্ৰিবিউশ্বন নন-কমাৰ্চিয়েল শ্বেয়াৰ এলাইক ২.০ জেনেৰিক লাইচেন্সৰ আধাৰত উপলব্ধ
মূল ৱেবছাইটঃ ফ্লিকআৰ

নীলা চৰাই . জানুৱাৰী ২০১২

আপোনাৰ আৰু ভাল লাগিব পাৰে:

সম্পাদক

editor@nilacharai.com

Leave a Reply

Be the First to Comment!

মন্তব্য দিয়ক:

wpDiscuz